БИШКЕК, 15-янв. — Sputnik. Президент Сооронбай Жээнбеков 2017-жылдын 16-январында Дача Су айылында Boeing-747 жүк ташуучу учактын кулашынан улам туугандарын жана жакындарын жоготкон балдар менен жолугушту. Бул тууралуу өлкө башчынын маалымат кызматы билдирди.
Президент аларга көңүл айтып, бүгүнкү күнгө чейин ошол каргашалуу күнү каза болгондорду жоктоо кайгы-муңу басаңдай электигин белгиледи.
"Ал күндөрү бүт өлкөбүз оор жоготууну баштан кечирип жатты. Терең кайгыруу менен дагы бир жолу сиздерге көңүл айтам", — деди Жээнбеков.
Анын айтымында, жабыркагандар өздөрү бир да жолу нааразычылык айткан эмес, анткени алардын бардык кайрылуулары өкмөттүк комиссия тарабынан өз убагында канааттандырылып жатты.
"Жабыркагандар өкмөттүк комиссия менен биргеликте тыгыз иштешти жана биздин бир да маселебиз, бир да көйгөйүбүз чечилбей калган учур болгон эмес. Бардык акча каражаттары, анын ичинде Кыргызстандын кайдыгер эмес жарандары тарабынан чогултулган каражаттар биз каалагандай, биз айткан сунуштарды эске алуу менен бөлүнүп берилди", — деди Шейшенова.
Президент менен болгон жолугушуунун соңунда балдар белекке планшет алышты.
Белиглей кетсек, былтыр 16-январда болгон авиакырсыктан жалпысынан 39 киши каза болгон.
