БИШКЕК, 6-дек. — Sputnik. Үстүбүздөгү жылдын 15-октябрында өткөн президенттик шайлоодо Лейлек районундагы шайлоо участкаларында оператор болуп иштегендер азыркыга чейин эмгек акысын ала албай жүргөнүн айтып, Sputnik Кыргызстан агенттигине Канжар Орозалиев кайрылды.
Орозалиев аталган райондун Катраң айыл өкмөтүнө караштуу Баул айылындагы №8040 шайлоо участкасында иштеген. Алар келгендердин биометрикалык маалыматын текшерип, шайлоочулардын тизмесинде бар-жогун тактап, добуш берүүгө укуктуу деген чек берип турушкан.
"Шайлоонун алдында айыл өкмөт менен келишим түзүп, үч күн оператор болуп иштегенбиз. Ал үчүн 6200 сомдон эмгек акы төлөп берүү макулдашылган. Бирок шайлоодон кийин райондук администрацияга барсак "бухгалтер жумушта жок же Бишкекке кеткен" деп артка кайтарууда. Банктык картабыздын реквизиттерин бергенибизге төрт апта болду", — деди Орозалиев.
Ал эми Мамлекеттик каттоо кызматынан эмгек акы аймактык шайлоо комиссиясынан берилери айтылган.
Бирок Лейлек райондук шайлоо комиссиясынын төрагасы Кочкорбай Сатаров акчаны Мамлекеттик каттоо кызматы төлөй турганын билдирди. Ал эми Мамкаттоонун маалымат кызматы муну четке кагат.
Мындан улам Sputnik Кыргызстан агенттигинин кабарчысы Лейлек райондук уюштуруу бөлүмүнүн башчысы Акжол Жоомартов менен байланышканда айрымдарынын банктык реквизиттери так болбогондуктан эмгек акылары кечигип жатканын айтып берди.
"Райондун аймактарындагы шайлоо участкаларында иштеген 220 оператор акысын ала элек. Айрымдарынын карточкалары так болбогону үчүн кармалып калды. Бүгүн биз толугу менен тактап бүттүк, эртеңкиге чейин баарынын акчалары эсебине которулат", — деди Жоомартов.
Ал эми айрымдарынын карточкаларында маселе жаралса баарына эмнеге берилбей жатат деген сурообузга Жоомартов так жооп бере алган жок.
220 операторго жалпы жонунан 1 миллион 364 миң сом эмгек акы төлөнүшү керек.
