БИШКЕК, 6-дек. — Sputnik. Баткен районундагы Самаркандек айылында ич келте оорусуна бир үй-бүлө шектелүүдө. Лабораториялык анализ эне менен кыздын аталган дартка чалдыкканын аныктап, ушу тапта 6 жашар баланын анализдери каралып жатат. Бул тууралуу Саламаттык сактоо министрлиги Оорулардын алдын алуу жана санэпидкөзөмөл департаментине таянуу менен билдирди.
Оорунун жайылып кетпеши үчүн жергиликтүү дарыгерлерден ыкчам штаб түзүлүп, алар айылды үймө үй кыдырып жүрүшөт. Жалпысынан 319 киши кароодон өтүп, алардан илдеттин белгилери аныкталган эмес.
"Суунун анализи 7-декабрда даяр болот. Андан сырткары, жугуштуу оорулардын алдын алуу боюнча Санэпидкөзөмөл департаментинин эскерүүлөрүн аткарбагандыгы үчүн айыл өкмөт башчысына 10 миң сом айып салынды", — деп айтылат маалыматта.
Учурда оору катталган аймакта түшүндүрүү иштери улантылууда.
