БИШКЕК, 4-дек. — Sputnik. Грузиянын вино жасоо ыкмасы дүйнө жүзү боюнча эң байыркы деп аталып Гиннес китебине киргизилди. Бул тууралуу РИА Новости уюмдун расмий сайтына таянып жазып чыкты.
Маалыматка ылайык, археологдордон түзүлгөн топ Тбилисиден 50 чакырым алысыраак, болжол менен биздин заманга чейинки 6000-5800-жылдарга таандык делген эки жерде казуу иштерин жүргүзгөн.
Изилдөөнүн жүрүшүндө археологдор ичинде суюктук сакталган эки идиш тапкан. Химиялык изилдөөнүн натыйжасында алардын ичинде буга чейин шарап сакталганы аныкталган.
Буга чейин шарап жасоонун байыркы каадасы Иранга таандык деп айтылып жүргөн. Алар винону биздин заманга чейин 5400-5000-жылдары даярдап баштаган.
