БИШКЕК, 13-июл. — Sputnik. Экономика министрлиги айрым спирт ичимдиктерине акциздик салыктын баасын көбөйтүүнү сунуштап жатат. Бул долбоор өкмөттүн токтому менен Салык кодексинин толуктоолоруна киргизилип коомдук талкууга коюлду.
Ведомстводон билдиришкендей, ушул жылдын февралында арак-шараптардын литрине болгон акциздик салыктын баасы 60тан 70 сомго чейин көтөрүлгөн.
"Баса белгилей кетсек, вино, коньяк каражаттарына 2013-жылдын мартынан, сырага 2014-жылдын июнунан, алкоголу төмөн продукцияларга 2014-жылдын февралынан бери акциздик баалар өзгөртүлө элек болчу", — деп айтылат маалыматта.
Бул жылы акциздик салыктардан 835 миллион сом чогултуу пландалууда. Экономика министрлиги акциздик баалар көтөрүлгөндөн кийин кошумча дагы 200 миллион сом чогуларын маалымдайт.
Спирт ичимдиктердин төмөндөгүдөй түрлөрүнө салыктарды жогорулатуу сунушталууда:
- Ачуу ичимдиктер, ачуу ширелер, бальзам жана алкоголу төмөн ичимдиктер — литрине 60тан 70 сомго чейин;
- Вино каржаттары — 3төн 4 сомго чейин;
- Вино — 9дан 12 сомго чейин;
- Сыра — 14төн 17 сомго чейин;
- Коньяк (коньяк спирттеринен сырткары) — 42ден 52 сомго чейин;
- Игрист виносу — 34төн 45 сомго чейин.
Ведомство салыктардын жогорулашы менен бюджеттин киреше бөлүгүн көбөйтүлөрүн жана спирт ичимдиктерин сатуу кыскара турганын билдирди.
