БИШКЕК, 17-ноя. — Sputnik. Кыргызстанда эстелик катары чыгарылган жаңы 2 миң сомдук банкнота колдонула баштаганын Улуттук банктан билдиришти.
Жаңы акчанын нумизматикалык баасы бар, ошол эле учурда кадимки соода-сатыкта катардагы акча катары да колдонууга болот. Бул Кыргызстандын тарыхында эстелик банкнота катары чыгарылган биринчи акча. Ал канча тираж менен чыгарылганы боюнча маалымат жок.
Бирок коммерциялык банктар аларда жаңы акчалар жок экенин билдиришти.
Жаңы акчада мамлекеттин түптөлүшү чагылдырылган. Негизги сюжет катары Манастын эстелиги менен эпостон алынган цитаталар колдонулган. Акчанын башкы бетинде Умай эне белгиси бар. Андан сырткары, башка коргоочу элементтер камтылган. Купюраны жантайыңкы кылып караганда 25 деген сан улуттук оюу-чийимге айланып өзгөрөт.
