Жээнбеков орус тилинин расмий статусу кандай болорун айтты

БИШКЕК, 8-ноя. — Sputnik. Кыргызстанда орус тилине расмий статус берилген, ал бул статусун кийин дагы сактап калат. Мындай пикирин жаңы шайланган президент Сооронбай Жээнбеков РИА Новости маалымат агенттигине берген маегинде белгилеген.

"Кыргызстанда орус тилине расмий статус берилген, ал мындан ары да сакталат. Бул боюнча Конституцияда дагы жазылган. Орус тили достуктун, Бириккен Улуттар Уюмунун тилдеринин бири", — деди Жээнбеков.

Ал ошондой эле орус тилдүү мектепте окуганын, орус тили ага илимдин чоң дүйнөсүнө, билимге, адабият менен маданиятка жол ачканын белгиледи.

"Тил билүү, анын ичинен орус тилин билүү — өзүңдү өнүктүрүүнүн эң кыска жолу. Кыргызстандыктар эң аз дегенде үч тилди билиши керек, андан дагы көп тил билсе эң сонун. Саякаттоо жана билим алуу үчүн дүйнө аларга чоң жана оор болбой калат. Бизге дагы көптөгөн чет элдик туристтер келет. Андыктан тил билүү адамдын жашоосун байытат", — деди Жээнбеков.

Жаңы шайланган президент Россия Кыргызстандын стратегиялык өнөктөшү экенин баса белгиледи.

"Акыркы жылдары Россия менен болгон мамиле ырааттуу түрдө өнүгүп жатат. Мен дагы бул ымаланын өнүгүшү үчүн болгон күчүмдү жумшайм. Биз саясий диалогду, коопсуздук тармакта кызматташууну, соода-экономикалык жана инвестициялык карым-катнашты жакшыртышыбыз керек. Ошондой эле маданий-гуманитардык өнөктөштүктү да алдыга жылдырышыбыз зарыл", — деди ал.

Эске салсак, 15-октябрда Кыргызстанда президенттик шайлоо өтүп, анда Сооронбай Жээнбеков жеңип чыккан.

Сооронбай Жээнбековдун толук маегин ria.ru агенттигинен окуңуздар.