Жээнбеков: Казакстан менен болгон көйгөйлөр жакында чечилет

БИШКЕК, 8-ноя. — Sputnik. Кыргызстандын жаңы шайланган президенти Сооронбай Жээнбеков Казакстан менен болгон мамиледеги көйгөйлөр убактылуу экенин айтып, жакынкы аралыкта маселе чечилерин РИА Новости агенттигине маек куруп жатып билдирген.

Үстүбүздөгү жылдын сентябрь айында Кыргызстандагы президенттик шайлоого байланыштуу Астана менен Бишкектин ортосунда дипломатиялык жаңжал жаралган. Казакстан чек арадагы көзөмөлдү күчөткөндөн кийин адамдардын өтүшү 2,5 эсеге кыскарган. Чек аранын Кыргызстан тарабында жүк ташуучу унаалардын узакка созулган тыгыны жаралган. Эки өлкөнүн премьер-министрлери 18-октябрда Астанада жолугуп, жөнөкөй адамдар менен жеңил унаалардын чек арадан өтүшүн жеңилдетүү боюнча макулдашкан. Ошондой эле бирдиктүү "жол картасын" түзүү боюнча жумушчу топ түзүлгөн.

"Кыргыз-казак мамилелери жалпы тарых, маданият, руханий байлык жана достуктун негизинде түзүлгөн. Учурдагы көйгөйлөр убактылуу гана көрүнүш. Анын үстүнө эки тарап маселени чечүү үчүн бир катар сүйлөшүүлөрдү жүргүздү. Жакынкы аралыкта бардык маселелер чечилерине ишенем", — деди Жээнбеков.

Президенттик шайлоо Кыргызстанда 15-октябрь күнү өттү. Мамлекет башчылыкка 11 адам талапкерлигин койгон. КСДП партиясынан талапкер Сооронбай Жээнбеков 54,7 пайыз добуш алып жеңишке жетишкен. Жаңы президенттин инаугурациясы 24-ноябрга белгиленген. Үстүбүздөгү жылдын декабрь айынан тарта президенттин мүмкүнчүлүктөрүн чектеген Баш мыйзамга киргизилген өзгөртүүлөр күчүнө кирет.

Интервьюнун толук текстин www.ria.ru сайтынан окуңуздар (14.00 Бишкек убактысы).