Бүгүн кулатуу эр таймаш боюнча WEF-42 Proffight турниринин салмакка түшүү аземи болду. Беттеш эртең кечки саат 18:00дө борбордогу спорттук ареналардын биринде өтөт.
Айыгышкан беттеште 21 жуп спортчу рейтинг үчүн чыкса, Өзбекстандын белгилүү мушкери Мурод Хантураев менен украиналык Игорь Задерновский чемпиондук наам үчүн салгылашат.
WEF федерациясынын президенти Руслан Кыдырмышев эртең боло турчу турнир тууралуу буларга токтолду.
"Хантураев дагы, Задерновский дагы өз өлкөсүндө төбөсү көрүнгөн мушкерлер. Андыктан ийгилик ташы кимге оой турганы өтө кызык. Хантураев былтыр Ош шаарында чемпион аталган, быйыл наамын коргоо үчүн чыгып жатат. Эгер утулуп калса наамы автоматтык түрдө атаандашына ыйгарылат", — деди Кыдырмышев.
Федерация жетекчиси ошондой эле турнирде рейтинг үчүн чыккан мушкерлердин жыйынтыгы эл аралык Sherdog порталына каттала турганын кошумчалады.
Спорт сүйүүчүлөр арасында көп убакыттан бери оор салмактагы "Ак аюу" каймана аты менен белгилүү кыргызстандык мушкер Мыктыбек Мамасалиевдин "Азия аюусу" каймана аты менен атагы чыккан өзбекстандык мушкер Мурод Хантураевди сегиз бурчтукта жолугуштурууга кызыгып келишкен. Бирок беттеш ушул убакка чейин ишке ашпай келет.
Sputnik Кыргызстан маалымат агенттигинин кабарчысы салмакка түшүү аземи учурунда бүйүр кызыткан суроолорго спортчурлардын өз оозунан жооп алды.
Алгач оор салмактагы өзбекстандык мушкер Хантураевди сөзгө тарканыбызда Мамасалиев менен беттешке чыгууну каалабай тургандыгын айтты. Себеп катары экөөнүн ортосундагы достук мамилени атады.
"Мен Мыктыбекти көптөн бери эле тааныйм. Көпчүлүк экөөбүздүн ортобуздагы беттешти күтүп жүргөнүн деле билем. Бирок Мыктыбек менин досум, достор кантип урушмак эле?" — деди Хантураев.
"Мурод жакында эле бизде өткөн WEF— Global турниринде казакстандык мушкерди утуп алды. Мен анда беттешти көргөнү баргам. Ошондо жеңиши менен куттуктап, кол алышканбыз. Биз спортто атаандаш эмес, дос бойдон калууну чечтик", — деди Мамасалиев.
WEF федерациясынын президенти Кыдырмышев мындай көрүнүштү эки спортчунун ортосундагы бекем ынтымак, бири-бирине болгон терең урматтоо катары сыпаттады.
"Бизге спорт сүйүүчүлөр башынан эле эки өлкөнүн мушкерин беттешке чыгаргыла деген сунуштарын тынбай киргизип келишкен. Булар абдан күчтүү спортчулар, ар биринин Орто Азияда аты бар. Эгерде спортчулар бир чечимге келген болсо, биз деле алардын оюн колдойбуз", — деди Кыдырмышев.
WEF жетекчиси ошондой эле аталган окуя мындан кийин Хантураев кыргыз мушкерлери менен урушпайт дегенди билдирбей турганын айтып, турнирдин кийинки серияларында Хантураев менен кыргызстандык мушкерлердин ортосунда беттештер боло турганын кошумчалады.
