БИШКЕК, 14-окт. — Sputnik. Жалал-Абад облусунун Базар-Коргон районуна караштуу Арстанбап-Ата айылынан табышмактуу таш табылды. Бул тууралуу Sputnik Кыргызстан агенттигине жергиликтүү жашоочу Режавали Аскаров билдирди.
Анын айтымында, 5,5 жана 2 килограмм салмактагы таштын бетинде түрдүү чиймелер жана башка элестер калтырылган.
"Сай жээгинен табылган табышмактуу нерсе үйүмдө сакталып турат. Мага түшүнүксүз болуп жатат, бирок адистер көрсө анын эмне болгон таш экенин дароо эле билишсе керек. Таштагы бул тамгалар жазуу болушу мүмкүн. Муну изилдеп көрүш керек. Бул өлкө үчүн баалуу нерсе болуп калышы ыктымал", — деди Аскаров.
Режавали Аскаровдун божомолунда бул таш темир да болушу мүмкүн. Анткени таштан кадимки эле электр тогу өтөт, бирок магнит жабышпайт.
"Муну темир деп эле таштап коюуга болбойт. Андагы чиймелер кайсы бир кылымдагы калтырылган жазуулар болушу ыктымал. Андыктан ташты дыкат изилдөө зарыл", — деди Аширалиев.
Ал ошондой эле бул ташты атайын металлографтар же болбосо минералдык заттарды изилдөөчү адистер изилдеп чыгуусу керектигин кошумчалады.
