Койчумановдун иш бөлмөсү көздүн жоосун алган сүрөттөргө толгон. Жасаган эмгектерин үңүлө карап отурсаң, жаратылыштын миң түркүн жерине барып келгендей болосуң. Сүрөтчүнүн тандаган жанры – этюд.
"Жаратылыш — менин жан дүйнөм. Үй-бүлөмдө сүрөт тарткан адамдар болгон эмес. Болгону туулуп-өскөн Ысык-Көлүмдүн сулуулугуна таасирленип, сугумду кагаз бетине түшүрдүм" — деди Койчуманов.
Бир сүрөтү 200 доллардан өйдө сатылат. Эң кымбат сүрөтү "Адашкан жолдор" деп аталып, 3 миң долларга бааланган. Эң узак убакытта жасаган эмгеги "Семетей" эки жылда аяктап, учурунда аны белекке берген. Сүрөтчү тартпай турчу да нерселер бар. Алар — майда нерселер жана эротика.
Койчуманов 2010-жылдан бери "Коб" деген ысымга ээ каарманы менен видео-комикстерди жаратат. "Коб" — аталган сөздүн тескери окулушу. Жаратман кыска видеолор аркылуу коомдогу социалдык көйгөйлөрдү тамашага салып жеткирүүнү көздөйт.
"Коб" катышкан видеодо сөгүнгөн жерлерди жөн эле койбойсуңарбы дегенди көп угам. Бирок Коб одоно сөздөр менен чыкканы үчүн эл маани берип, интернетте ордун тапты деп ойлойм. Азыр убактыма байланыштуу уландылары кеч чыгып жатат. Баса, Кобдун тексттерин сөзүн өзүм жазып, өзүм коштойм" — деди сүрөтчү.
"Анимация тартуу оңой иш эмес. Анда ар бир кыймылды кагаз бетине түшүрүү бир топ эле татаал" — деди Койчуманов.
Учурда Төлгөбек сүрөтчүлүк менен кошо тасма талаасында да эмгектенет. Кыргызстандагы белгилүү кинофильмдердин бири "Саякбай", "Курманжан датка" тасмаларында сүрөтчү-декоратор болуп иштеген.
Талыкпаган эмгеги үчүн 2016-жылы президенттин Ардак грамотасына, "Аку" тасмасы үчүн "Ак Илбирс" улуттук кино сыйлыгынын мыкты-сүрөтчү номинациясына татыган.
