Бишкектеги цирктин залына Sputnik агенттигинин тартуу тобу баш бакканда анда машыгып жаткан балдар бизди карамак түгүл, баштарын бурган дагы жок. Көрсө бул жакта тартип темирдей экен.
Биз чыдамкайлык менен машыгуулардын аякташын күтүп, өлкөнүн эң ийкемдүү кызы менен баарлаштык. 15 жаштагы Милена Урулдаева биздин келгенибизге кубанып "эң ийилчек кыздардын биримин" деп сыймыктануу менен айтты.
Анын цирктеги тарыхы үч жыл мурун теледен көрсөтүлгөн гимнасткалар тууралуу программадан башталган. Жөнөкөй айылдык кыз көргөнүн кайталап атып, бир жумадан кийин артка ийилгенди үйрөнгөн. Ал эми бир ай өткөн соң шпагатка отурган. Өнөрүн өркүндөтүү үчүн ага үч жыл керектелген.
"Башында денем ооруп кыйналгам, бирок кийин көнүп кеттим. Учурда жумасына беш жолу үч сааттан машыгам. Залга келбей калган күнүм болгон эмес", — деди 10-класстын окуучусу.
Кыздын машыктыруучусу Жыпара Шамырова Милена Кыргызстандагы таланттарга арналган телешоуда катышканда жардам берген. Натыйжада окуучусу экинчи орунду ээлеген.
"Милена табиятынан өзгөчө кыз деп айта албайм, анын ийгилиги эмгекчилдигинде", — деди машыктыруучу.
Цирк артистинин ата-энеси анын мындай өнөрүнө алгач каршы чыккан. Кызынын ийилип-чоюлуп, ден соолугуна коркунуч жаратып жатканына жүрөктөрү чыдаган эмес.
"Классташтарым "сонун, азаматсың" деп калышат. Учурда мектептеги бардык майрамдык иш-чараларга катышам. Тойлорго дагы чакырып калышат. Эми болсо циркте дагы өнөрүмдү тартуулап жатам", — деди Милена.
Ал 29 жаштагы цирк артисти Аида Акматовадай болгусу келет. Акматова буту менен жаа атып Гиннес китебинин Кыргызстандагы аналогуна кирген.
