Окуучулардын комага түшүшүнө себепкер мас айдоочуну ата-энелер кечирди...

БИШКЕК, 18-июл. — Sputnik. Бишкектин Бакаев жана Ремесленная көчөлөрүнүн кесилишинен унаа койдуруп кеткен окуучу бардардын ата-энеси айыпталуучуга доосу жок экенин билдирген арыз жазып беришти. Бул тууралуу бүгүн соттолуучу Мирлан Ажыбековдун үстүнөн болуп жаткан Ленин районундагы соттун кезектеги отурумунда белгилүү болду.

Жабырлануучу тараптын жактоочусу Шарабидин Токтосуновдун айтканына караганда, ата-эненин мындай кадамга барышына айыпталуучу тарап алардан кечирим сурап, бардык моралдык жана материалдык чыгымдарын толтуруп бергени себеп болду.

"Ата-энелер мындай чечимди өз каалоосу менен кабыл алышты. Башында жабырлануучуларга айыпталуучунун жакындары тарабынан коркутуп-үркүтүүлөр болгон экен. Алар укук коргоо органдарына арыз менен кайрылганда, эки үй-бүлөгө тең коргоочу кызматкерлерди бөлүп берген. Алар ушул убакка чейин коргоодо турушат, ошондон бери соттолуучу тараптан каршылык болгон жок", — деди Токтосунов.

Ал кошумчалагандай жабырлануучулардын тосмо арыз жазып бергени кылмыш ишин кыскартып коюуга негиз боло албайт.

"Экспертизанын жыйынтыгы боюнча айдоочу мас абалда болгон деген корутунду бар. Мыйзам боюнча эки тарап элдешкен күндө дагы соттук иштер уланат. Бир гана айдоочунун окуя болгон жерден качып кетүү фактылары боюнча жеңилдик бериши мүмкүн", — деди адвокат.

Кезектеги соттук отурум 19-июль күнгө белгиленди.

Жабырлануучу тараптын жактоочусунун билдиргенине караганда, учурда эки окуучунун тең абалы начар деп бааланууда.

Эске салсак, 2017-жылы 21-апрелде Бишкек шаарынан Mercedes Benz автоунаасы Бакаев жана Ремесленная көчөлөрүнүн кесилишинен эки окуучуну коюп кеткен. Айдоочу окуя болгон жерден из жашырган. Жабыркаган окуучуларды балдардын №3 шаардык тез жардам клиникасына оор абалда алып келишкен. 

Айдоочу бир нече сааттан кийин кармалып, анын мас абалда болгону аныкталган. 

Дагы бир белгилей кетчү жагдай, шектелүүчүнү суракка алуу маалында Бишкек шаардык Кайгуул милициясынын издөө бөлүмүнүн жетекчиси Ажыбек Майназаров бул адам мындан эки жыл мурун адам өлүмү менен аяктаган жол кырсыгынын күнөөкөрү болушу мүмкүндүгүн айткан.

"Мен аны дароо эле тааныдым. 2015-жылы бул адамды издөөгө катышкам. Анда бир адамды өлтүрө сүзгөн. Бирок каза болгон адамдын туугандары муну кечиришкен. Бул адам насыя алып, өлүмдүн бардык чыгымын көтөрүп берген. Азыр болсо насыядан кутулуш үчүн ошол эле адамдарга иштээри белгилүү болду", — деген анда Майназаров.

Ал эми бүгүнкү сот отурумунда соттолуучу жабырлануучу тараптын жактоочусунун мурда жол кырсыгына катыштыгы бар-жогун сураганда, бир нече жыл мурда жолго чукрап чыккан мас адамды кагып алганы чын экенин билдирди.