Оштун Жапалак айылында 83 жаштагы абышка кемпирине бычак сайган деп шектелүүдө. Бул тууралуу Sputnik Кыргызстан радиосуна Ош ШИИБдин маалымат кызматынын өкүлү Замир Сыдыков билдирди.
Анда Ош шаарына караштуу Жапалак айылынын Аттокуров кѳчѳсүндѳ аял киши жол боюнда канга боелуп жаткандыгы айтылган. Окуя болгон жерге барган Ош шаардык ички иштер башкармалыгынын жетекчилиги, оперативдүү тергѳѳ тобу ал аялдын ким экендигин аныкташкан.
Ош шаардык ИИБдин басма сөз катчысы Замир Сыдыковдун маалыматында, ал 79 жаштагы жаран болуп чыккан. Милиция кызматкерлери денесин карап чыкканда, моюнга бычак жеп каза болгондугу аныкталган.
"Кылмыштын изи сууй электе Ош шаардык ички иштер башкармалыгынын кызматкерлери шек санап маркумдун абышкасын, 83 жаштагы жаранды кармаган", — деп билдирди Сыдыков.
Тергѳѳнүн алгачкы жыйынтыктары кѳрсѳткѳндѳй, маркум канжалаган боюнча кѳчѳгѳ жардам сурап жүгүрүп чыгып, бирок, канды кѳп жоготкондугуна байланыштуу үйүнүн алдына кулап, жан берген.
Учурда бул факты боюнча кылмыш иши козголуп, тергѳѳ жүрүп жатат. Кылмышка шектүү Ош шаарындагы убактылуу кармоо жайында отурат.
