БИШКЕК, 9-июл. – Sputnik. Тюменде эки жашар баласын ыйлаганы үчүн сабап өлтүргөн 26 жаштагы кыргызстандык киши соттолгонун Россиянын Тюмень облусу боюнча Тергөө башкармалыгынан кабарлашты.
Мындай трагедиялуу окуя үстүбүздөгү жылдын февраль айында катталган. Ыйлаган наристеге ачуусу келген ата аны башка-көзгө койгулап сабап салган. Натыйжада бала өзүн жогото баштаганда, Тез жардам чакырышкан. Бирок наристе ооруканадан өзүнө келбей көз жумган.
Алгач кармалган киши баласын сабаганын моюндаган эмес, бирок акыр аягы анын күнөөсү далилденип жети жылга эркинен ажырады.
