БИШКЕК, 16-июл. — Sputnik. Кыргызстандык он спортчу Дүлөйлөрдүн 23-олимпиадалык оюндарына (Сурдлимпиялык оюндар) катышат. Бул тууралуу Жаштар иши, дене тарбия жана спорт агенттигинин маалымат кызматы билдирди.
Сурдлимпиялык оюндар — угуусу начар адамдардын спорттук мелдеши. Ал 1924-жылдан бери өткөрүлүп келет. Быйыл бул оюнга 109 мамлекеттен 4 миңден ашык спортчу барып, спорттун 21 түрү боюнча ат салышат.
Кыргызстандык спортчулар грек-рим күрөшү, эркин күрөш, дзюдо жана таэкван-до боюнча өлкө намысын коргойт.
Эгер спортчу биринчи орун алса өкмөт тарабынан 100 миң алат. Экинчи орун алгандарга 70 миң жана үчүнчү орунду камсыздагандарга 50 миң сомдон берилет.
Андан сырткары башкы жана жеке машыктыруучуларга, спортчуларга берилген акча каражатынын 25 пайызы сыйлык катары каралган.
Аталган оюндар 18-июлдан 30-июлга чейин Түркиянын Самсун шаарында өтөт.
