БИШКЕК, 3-июл. — Sputnik. Түптүн Сары-Тологой айылынын тургуну Тураргүл Осмонова үч эм балдарды жарык дүйнөгө алып келди. Бул туурасында Ысык-Көл облустук төрөт үйүнүн башкы дарыгери Назгүл Карабаева Sputnik Кыргызстан агенттигинин кабарчысына билдирди.
Анын айтымында, ымыркайлар 28-июнь күнү операция жолу менен төрөлгөн.
"Бөбөктөрдүн бардыгы кыздар. Биринчисинин салмагы 1144 грамм болсо, экинчисиники — 904, үчүнчүсүнүкү —980 грамм болду. Жаңы төрөлгөндө ымыркайлардын абалы оор болгондуктан жасалма дем алдыруучу СИПАП аппаратына жаткырылган. Азыр экөө ал аппараттан чыгарылып өз алдынча дем алууга жарап калды. Эненин абалы да канааттандырарлык. Ымыркайлар алсыз болгондуктан энесин саап сүтүн берип жатабыз", — деди дарыгер.
Айбек Шакеев менен Тураргүл Осмонованын төрт жаштагы жалгыз уулу бар. Үч эмге азырынча ысым бериле элек.
