БИШКЕК, 30-июн. — Sputnik. Бүгүн башталган "Диний билим берүүдөгү методикалык ыкмалар: эл аралык тажрыйба жана Кыргызстан" деген аталыштагы академиялык семинар 1-июль күнү аягына чыгарын Дин иштери боюнча мамлекеттик комиссиянын маалымат кызматынан билдиришти.
Иш-чарага Улуу Британия, Франция, Түркия, Индонезия, Россия жана Казакстандан келген адистер катышууда.
КРдин Дин иштери боюнча мамлекеттик комиссиясынын директору Зайырбек Эргешов дин тармагындагы мамлекеттин саясаты тууралуу айтып берди.
"Республиканын 10 жалпы билим берүү мекемесинде "Дин маданиятынын негиздеги" сабагын киргизүү боюнча пилоттук долбоор ишке ашты. Анын негизинде ушул жылы аталган предмет дагы 56 мектептин окуу программасына киргизилет", — деди директор.
Ошондой эле семинарда бир катар диний жана мамлекеттик кызматкерлер диний түшүнүктү жөнгө салуу боюнча өлкө ичинде жана башка мамлекеттер менен биргеликте жүргүзүлүп жаткан иштер боюнча айтып беришти.
Колшумчалай кетсек, аталган семинар Дин иштери боюнча мамлекеттик комиссия тарабынан Ишеналы Арабаев атындагы МКУ жана Ага Хан университети менен бергеликте уюштурулду.
