150 жыл мурда жашаган кыргыздар. АКШлык изилдөөчүнүн сүрөттөрү

БИШКЕК, 25-янв. — Sputnik. 19-кылымдын аягында америкалык журналист жана иликтөөчү Жордж Кеннан Россия империясын кыдырып, көп улуттуу мамлекетти байырлаган жашоочуларды сүрөткө тартып алган.

Кеннан орус-америка компаниясынын иликтөөчүлөрү менен биринчи жолу 1864-жылы Россияга келген. Алар АКШдан Россияга Аляска аркылуу телеграф салууга мүмкүндүгүн изилдешкен. Телеграф Россиянын Чукотка жана Сибирь аймактары аркылуу өтмөк. Аймакты кыдырып, жергиликтүү эл менен жолугушкан. Телеграфты Алтантика океанынын түбү менен салуу чечими кабыл алынгандан кийин алар кетүүгө аргасыз болушкан. Кеннан мекенине кайткандан кийин "Сибирдеги көчмөн жашоо" деген китебин жарыялаган.

1870-жылы ал Россияга экинчи жолу келген. Бул жолу Волга дарыясы менен Санкт-Петербургдан Каспий деңизине чейин сүзүп өткөн. Кавказ аймагына келгенде ал грузиндер, армяндар жана бул аймакта жашаган ондогон башка этникалык топтордун өкүлдөрү менен жолугат

АКШда он жылдан ашык журналист болуп иштеген Кеннан 1885-жылы досу Жордж Фрост менен Россияга үчүнчү жолу келген. Алар Казакстан, Монголия жана Кытайдын чек арасындагы Алтай тоолорун изилдешкен. Иш учурунда бул аймакты жердеген жергиликтүү эл менен жолугуп, кыргыздар менен да баарлашкан.

Sputnik Кыргызстан агенттиги ошол учурда Түркестан аймагын жердеген көчмөн кыргыздардын жана башка элдин сүрөттөрүн жарыялайт.

Бардык сүрөттөр 19-кылымдын 70-80-жылдары тартылган.

Жордж Кеннандын тарткан сүрөттөрү кийин Конгресс китепканасына документтери менен чогуу берилген. Кеннан өз сапарында 19-кылымда жашаган орус жазуучуларын, акындарын, мамлекеттик кызматкерлерди, ошондой эле Алтай, Кавказ, Сибирь аймактарын жана түрмөгө түшкөн кишилерди да тартып калган.