БИШКЕК, 7-дек. — Sputnik. Улуу жазуучу Чыңгыз Айтматовдун чыгармаларынын негизинде тартылган тасмалардын "Айтматов жана кино" деп аталган DVD-коллекциясы тартуулана турганын Кинематография департаменти билдирди.
Маалыматка ылайык, бет ачар азем Айтматовдун туулган күнүнө карата, 12-декабрда Кино үйүндө өтөт.
"Коллекцияга жазуучунун "Жамиля", "Эрте келген турналар", "Ашуу", "Кылым карытар бир күн", "Гүлсарат" чыгармалары боюнча тартылган сегиз тасма кирген", — деп айтылат билдирүүдө.
DVD-коллекция Маданият, маалымат жана туризм министрлиги менен Кинематография департаментинин биргелешкен долбоору катары Тарых жана маданият жылына, ошондой эле кыргыз киносунун 75 жылдыгына арналган.
