БИШКЕК, 4-сен. — Sputnik. Бүгүн Чүй облустук соту улуттар аралык жаңжалды козуткан деп өмүр бою эркинен ажыратылган Азимжан Аскаровдун ишин карап жатат. Сот процесси Жазаларды аткаруу боюнча мамлекеттик кызматтын Күзөт департаментинин имаратында болууда.
Буга чейин Жогорку сот Жалал-Абад облустук сотунун өкүмүн жокко чыгарып, июль айында ишти Чүй облустук соттун кароосуна жиберген. Сот жаңыдан ачыкка чыккан жагдайлардан улам ишти кайра кароону чечкен.
Бүгүнкү сот отурумунда Аскаров окуя болгон жерден тартылган видео тасманы көрсөтүүнү жана бардык күбөлөрдү кайрадан сурап чыгууну талап кылды.
Ал ошол кездеги башкы прокурор Азимбек Бекназаровду чакырууну талап кылды. Ал кишиде 2010-жылдагы кандуу окуяларда Аскаров түшүп калган видео бардыгы айтылып келе жатканын билдирди.
"Алар алты жылдан бери ошол видео жазууну көрсөтө албай келе жатпайбы. Эмне үчүн экенин билесиздерби? Себеби, андай видео жок", — деди ал.
Аскаров күнөөсү далилденсе, аны тартууга даяр экенин айтты.
"Эгерде менин күнөөм далилденип чыкса, мага элдин көзүнчө катуу жаза бергиле", — кайрылды ал сотко.
Бир нече ай мурда Аскаровдун жактоочулары анын кыйноого кабылганын айтып, БУУнун адам укугу боюнча комитетинин чечимине таянуу менен Аскаровду түрмөдөн бошотууну талап кылышкан.
