БИШКЕК, 13-сен. — Sputnik. Эки жаштагы Умар Молдалиевди сактап калган Көлмө жаңы конушундагы №78 мектептин окуучулары атайын сыйлыкка татыктуу болду. Бул туурасында Бишкек шаардык кеңешинин маалымат кызматы кабарлады.
Баяман Азимов мектептеш достору Арсен Камбаралиев жана Эрнис Ташболотов менен биргеликте баланын өмүрүн алып калган. Алар агып келе жаткан бөбөктү суудан алып чыккандан кийин, Баяман балага дарыгер келгиче жасалма дем алдырып, ага экинчи жашоо тартуулаган.
Бул жакшы иштери үчүн Баяманга Бишкек шаардык кеңешинин Ардак грамотасы менен "Мекенчил" төш белгиси ыйгарылды.
Ал эми Арсен менен Эрниске аталган кеңештин Ардак грамотасы тапшырылды.
Кененбаев жаш баатырларга жана №78 мектептин педагогдор жамаатына каарман балдарды тарбиялагандыгы үчүн ыраазычылык билдирди.
