БИШКЕК, 9-сен. — Sputnik. Мекке шаарындагы Мухамед пайгамбардын басып өткөн жолун чагылдырган тарыхый жерлердин бири "Ассаламу алайка Айюха Аннаби" музейинен жасалган сүрөт репортажды окурмандарга тартуулайбыз.
Бул музейде пайгамбардын өмүр таржымалы, басып өткөн жолу, Мина, Арафат, Муздалифа өрөөндөрү жана эски Харам мечити, VII кылымдагы үйлөр жана Пайгамбардын Меккеден Мединага сапар алган түйшүктүү жолун камтыган үч мерчемдүү (3D) макеттер камтылган. Бул ири тарыхый музейде Мухаммед пайгамбардын кийимдери, зооттору, куралдары, колдонгон идиштерине чейин, ал тургай кол жазмалары да коюлган.
Кыргызстандан барган зыяратчылар да бул жерди көрүп, таасирленгенин байкоо кыйынга турган жок.
"Биз кайрадан VII кылымга түрүлүп, кайтып баргандай болдук", — деди бул сапарда жүргөн муфтияттын өкүлдөрү жана зыяратчылар.
Аталган музейде 14 кылым мурдагы буюмдардын сакталып келе жаткандыгын көрүүгө болот.
"VII кылымдагыдай макеттер чеберчилик менен жасалгандыктан, ошол доорго алып барып коет экен. Сүрөттөрдө картиналар караңгы жерде илинип турат. Ага жакындап барганда сезимтал экрандар экенин байкоого болот. Сенсердик экрандан тарыхты баяндаган сүрөттөрдү барактап көрүү мүмкүнчүлүгү түзүлүптүр", — деди зыяратчылардын бири.
Бүткүл дүйнөгө белгилүү бул тарыхый музейди доктор Наср Нахрайн түптөгөн деп айтып келишет. Ал пайгамбардын басып өткөн жолун өмүрүнүн акырына чейин жазып калтырууга аракет кылган.
