БИШКЕК, 9-сен. — Sputnik. 10-сентябрда түнкүсүн Кыргызстандын бир катар райондорунда өткүн өтүп, күн күркүрөйт. Бийик тоолуу райондордо кар жаай турганын Кыргызгидромет билдирди.
Маалыматка ылайык, Бишкек жана Ош шаарында күндүз күн 31 градуска чейин ысыйт.
Кыргызгидромет узакка созулган аномалдуу кургак жана жылуу аба ырайынан кийин Кыргызстандын аймагында 11-сентябрдан тарта аба ырайы кескин өзгөрөрүн эскертет.
Кээ бир райондордо батыштан соккон шамалдын ылдамдыгы секундасына 18-23 метрге жетиши мүмкүн. Абанын күндүзгү температурасы Чүй, Ош, Жалал-Абад, Талас жана Баткен облустарынын дыйканчылык аймактарында 20…25 градус жылуу, Ысык-Көл жана Нарын облустарынын дыйканчылык аймактарында 13…18 градуска чейин жылуу болот.
Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат. 12-14-сентябрда күтүлүп жаткан нөшөрлүү жаан-чачынга байланыштуу Ысык-Көл облусунун тоолуу жана тоо этектериндеги райондорунда сел жүрүшү мүмкүн.
