ЧОЛПОН-АТА, 5-сен. — Sputnik. Кырчында өтүп жаткан эл аралык иш-чаранын биринчи күнү төрт унаа таштанды тазаланды. Бул тууралуу Sputnik Кыргызстан агенттигинин кабарчысына Туризм департаментинин жетекчиси Азамат Жаманкулов билдирди.
Эске сала кетсек, буга чейин социалдык тармактарда Кырчын жайлоосунда таштандылар тазаланбай жатат деген маалыматтар тараган.
"Кечээ күнү Кырчындан төрт унаа таштанды тазаладык. Жайлоо таштандыга толуп кетти деген маалымат чындыкка коошпойт. Ыктыярчыларыбыз жакшы иштеп жатышат. Бүгүн ушул сааттарга эки унаа таштанды чогулуп калды. Кечке дейре төрт унаа болот окшойт", — деди Жаманкулов.
Ал эми Кырчындагы ыктыярчылардын координатору Мээрим Кайдалиева кечээ күнү үч саат бою тазалоо иштери жүргөнүн билдирди.
"Кырчын жайлоосунда таштанды жаатында көйгөй жаралган жок десем жаңылбайм. Анткени бизге бөлүнгөн 123 ыктыярчы бат-баттан эле тазалап жатышат. Кечээ күнү кетээр алдында кечки саат бештен тартып сегизге чейин иштешти", — деди Кайдалиева.
Ал акыр-чикир таштоо үчүн атайын челектер орнотулганын айтып, боз үйдөгүлөр да таштанды тазалоого көмөктөшүп жатканын кошумчалады.
II Дүйнөлүк көчмөндөр оюндары 8-сентябрга чейн уланат.
