ЧОЛПОН-АТА, 5-сен. — Sputnik. Көчмөндөр оюндарынан мекенге медалсыз кайтпайбыз. Бул тууралуу Башкыртстандан келген спортчу Фарид Мурсалов Sputnik Кыргызстан агенттигинин кабарчысына билдирди.
Балбан көчмөндөр оюндарынын ачылыш аземи эбегейсиз салтанат менен өткөнүнө суктанп жатканын жашырган жок.
"Мен кыргыз күрөш, азер күрөшү жана белбоо күрөшү боюнча күч сынашам. Буюрса даярдыгыбыз ойдогудай. Биз жашап жаткан пансионаттын жанында спорт зал бар экен, таң эрте ошол жакта даярданып жатабыз. Башкыртстандан 16 спортчу келгенбиз. Бир балбаныбыз Рустам Арсланов кечээ күнү казак күрөшүнөн алтын тагынды. Бүгүн да медалсыз кетпейбиз деген ишеним чоң", — деди Мурсалов.
Ал жергиликтүү тургундар жылуу кабыл алгандыгын айтып, уюштуруу жаатында кемчиликтер жокко эсе экенин кошумчалады.
II Дүйнөлүк көчмөндөр оюндары 8-сентябрга чейин уланат.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиаөнөктөшү болуп саналат.
