Казакстандык машыктыруучу: сыналгы жок таймаш кандай өткөнүн билбей жатабыз

ЧОЛПОН-АТА, 5-сен. — Sputnik. Килемге чыкчу спортчулардын даярдануучу бөлмөсүндө сыналгы жок болгону ыңгайсыздык жаратууда. Бул тууралуу Көчмөндөр оюнуна белбоо күрөшү боюнча келген казакстандык курама команданын башкы машыктыруучусу Эрлан Сатбаев айтып берди.

Ал спортчулардын жатаканасы менен тамак-ашында айып жок экенин айтат.

"Учурда өтүп жаткан азербайжандыктардын гюлеши боюнча медаль тагынууга мүмкүнчүлүк азыраак. Анткени эрежелери такыр башка. Ошентсе да күч сынашып көрүүдөн качпайбыз. Казакстандан келген делегациянын 11 спортчусу — балбандар", — деди Сатбаев.

Ал шарттар жакшы түзүлгөнү менен бир аз кемчиликтер бар экенине токтолду.

"Баары эле сонун. Жаткан жерибиз, тамак-ашта айып жок. Бирок жашаган жерибизден спорт залга жетүү кыйынчылык жаралууда. Мындан сырткары, килемге чыгаар алдында даярданчу бөлмөдө сыналгынын жоктугу жаман болуп жатат. Анткени килемде кармаш кандай өтүп жаткандыгын көрбөй жатабыз", — деди машыктыруучу. 

Эскерте кетсек, казакстандык улакчылар көк бөрү боюнча өз тайпасында Красноярк, Кытай жана АКШ командаларынан озуп, алдыда келе жатат.

II Дүйнөлүк көчмөндөр оюндары 8-сентябрга чейин уланат. 

Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиаөнөктөшү болуп саналат.