ЧОЛПОН-АТА, 4-сен. — Sputnik. II Дүйнөлүк көчмөндөр оюндарына келген Беларусиялык команданын өкүлү Татьяна Гудко алардын спортчулары таяк тартыш мелдешинде финалга чыга албай калганын билдирип, ошол эле учурда "Кыргызстанга дагы келип кетүүгө каалоо жаралганын" Sputnik Кыргызстан агенттигинин кабарчысына билдирди.
Ысык-Көл облусунда 3-8-сентябрда Экинчи Дүйнөлүк көчмөндөр оюндары өтүүдө. Ага 62 мамлекеттен өкүлдөр келген.
Белорусиянын өкүлү Гудконун айтымында, көчмөндөр оюндарына алардан алты спортчу келген (алыш, кыргыз күрөш, гореш, аба куреш, таяк тартыш).
"Биз Кыргызстанга биринчи жолу келдик. Чынында жол узак болду. Бирок бизди аба майдандан эң сонун тосуп алышканда эле чарчаганыбызды унутуп калдык", — дейт ал.
Гудко ошондой эле ак кар жамынган көк тиреген тоолорду көргөнүн айтып, абдан кубанганын кошумчалады.
"Бизде мындай нерсе жок. Ысык-Көлдүн абасы, табияты эң сонун. Биз деңиз деңгээлинен 2 миң метрден ашык турганыбыз менен бат эле көнүп кеттик", — дейт Беларусиянын өкүлү.
Дүйнөлүк көчмөндөр оюндарында улуттук спорттун 26 түрү боюнча мелдеш болот.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиа өнөктөшү.
