Ошондой эле мемориалдын ачылышына Жогорку Кеңештин төрагасы Чыныбай Турсунбеков, КР премьер-министри Сооронбай Жээнбеков жана КР Жогорку Сотунун төрайымы Айнаш Токбаева катышты.
Атамбаев өз сөзүндө бүгүн кыргыз эли үчүн өзгөчө күн экенин, эл мойнунда жүз жылдан бери жүк болуп жүргөн ыйык парзды өтөп жатканын айтты.
"Бүгүн биз элибиздин жүрөгүн жүз жылдан бери оорутуп жүргөн, жүз жыл мурда улуттук көтөрүлүштө, Үркүндө шейит болгондордун жаркын элесине арналган эстелик ачып жатабыз. ошо Каргашалуу окуяларда курман болгон аталар, апалар, кыз-жигиттер, наристелер, ымыркайлар, кечирип койгула бизди! Жүз жыл кечиккенибиз үчүн кечирип койгула бизди. Кеч болсо да парзыбызды аткарып жатабыз. Кеч болсо да сиздерге куран окуп, жалпы элибиз таазим этээр эстелик ачып жатабыз", — деди ал.
Өлкө башчысы өз сөзүндө 1916-жылдагы каргашалуу окуяда шейит болгондорду унутпоо керектигин белгилеп, улуттук-боштондук көтөрүлүштө жана Үркүндө шейит болгондор Кыргыз мамлекеттүүлүгүн түптөгөндөр менен бир катарда турушу керектигин баса белгиледи.
