БИШКЕК, 2-сен. — Sputnik. Бишкек шаарына Голивуддун жана дүйнөнүн атактуу актеру Стивен Сигал келгендигин "Манас" аэропортунан билдиришти.
Америкалык актер президент Алмазбек Атамбаевдин чакыруусу менен келди. Ал Экинчи дүйнөлүк көчмөндөр оюндарынын ачылыш салтанатына катышат.
"Менин оюмча көчмөндөрдүн маданияты өтө маанилүү. Менин ата-бабаларым да көчмөн болгон. Ошондуктан Көчмөндөр оюндарына келүүнү чечтим. Эң башкысы өлкө башчысынын чакыруусунан баш тарта алган жокмун", — деди актер.
Сигал Атамбаев менен кезигүүнү чыдамсыздык менен күтүп жатканын жашырган жок.
"Мен президенттен сырткары Asian World Film Festival кинофестивалынын негиздөөчүсү, жакын санаалашым Садык Шер-Нияз менен жолугуп, Кыргызстандагы кино индустриясы тууралуу сүйлөшкүм келет", — деди Сигал.
Ал жакынкы аралыкта Кыргызстанда тасма тартып калуусу мүмкүн экенин жашырган жок.
Ири эл аралык иш-чара Ысык-Көл облусунда 2016-жылдын 3-8-сентябрында өтөт.
Sputnik Кыргызстан маалымат агенттиги жана радиосу Көчмөндөр оюндарынын расмий медиа өнөктөшү.
