БИШКЕК, 26-авг. — Sputnik. Америкалык айым Сара ДеАнтони Ысык-Көлдүн күңгөйүнөн тескейине сүзүп өттү. Бул тууралуу Peace Corps Kyrgyz Republic Facebook социалдык тармагындагы расмий баракчасына жарыялады.
Кыргызстанда ыктыярчы болуп жүргөн Сара ДеАнтони уламышта айтылган тору айгыр сүзгөн багыт менен Ысык-Көлдүн күңгөйүнөн тескейин карай сүзүп өттү.
"Мен спорт менен машыгып, дени сак жашоодо өмүр сүргүм келет. Бул кадамым менен айымдар да эркектерден калбай эле ийгиликке жетсе болорун далилдегим келди", — дейт Сара ДеАнтони.
Ал Ысык-Көлдүн Тору-Айгыр айылынан сууга түшүп 13,1 чакырымды 4 саат 43 мүнөттө басып өттү.
Видеодогу маалыматка ылайык, Сара Ысык-Көлдү сүзүп өткөн үчүнчү адам. Мындан сырткары, ал убакыт боюнча буга чейинкилер арасынан бат келип, рекорд койду.
Баса, Сара Ысык-Көлдү сүзүп өткөн биринчи айым болуп калды.
Ал эми уламыш боюнча Бакыт аттуу жетим баланы айылындагы манап малчы кылып алат. 17 жыл мал кайтарган Бакыт таман акысына араң жан кулун алып, аны чоңойто баштайт. Убакыттын өтүшү баягы кулундан күлүк чыгып, той-аштарда байгени эч кимге бербейт. Ошол учурда Бакыттын аты тору айгыр аталып, атагы ааламга кетет. Каргашалуу күндөрдүн биринде каракчылар Бакытты сабап, айгырды уурдай качат. Алар жылкыны Ысык-Көлдүн тескейине жашырып, катуу кайтарууга алат. Жаныбар менен адам баласынын ортосунда сөз менен айткыс мээрим бар эле. Өз ээсин сагынган тору айгыр качып чыгып, каракчылардын камоосунда көлгө барып такалат. Уурулар мына эми айгырды кылтакка иле турган болгондо жылкы буйтай качат да, көлгө боюн таштайт. Туздуу суу жаныбардын терисин шылып, катуу толкунда кулагына суу кирет. Анткен менен тору айгыр Бакыт байырлаган айылдан сүзүп чыгат да, Бакыттын колунан жан берет. Убакыттын өтүшү менен жылкы өлгөн жерге адамдар отурукташып, кийин айыл болуп кеткен.
