БИШКЕК, 26-авг. — Sputnik. Крымдын прокурору Наталья Поклонская Мамлекеттик Думага карата шайлоо учурунда жарым аралдын аймагында мыйзам бузууга аракет жасагандар катуу жазалана тургандыгын билдирди.
Август айынын башында Россиянын федералдык коопсуздук кызматы Крымда уюштурулуп жаткан бир катар терактылардын алдын алган. Мындай чабуулдар Украинанын коопсуздук министрлигинин чалгындоо башкармалыгы тарабынан уюштурулганы айтылган. Алардын негизги максаты саясий социалдык абалды туруксуздаштырлуу болуп эсептелген.
"Эскертип коеюн, абакта бош орун көп. Магадан менен түндүк округдардан дагы бош орун табылат. Россия чоң, кышы суук. Ошондуктан мамлекетке, элдин эркиндиги менен баалуулуктарына бир дагы адам кол салбасын. Антпесе, кылган иштерин мойну менен тартууга аргасыз болушат", — деп билдирди Поклонская.
Прокурор алдыда өтө турган шайлоо абдан маанилүү экенин баса белгиледи. Себеби, алдыда жарым аралдын интеграциясын толук бүткөрүү иштери күтүп турат.
"Саясий интеграцияны бүткөрүү гана калды. Калган иштер боюнча бардык процесстер аягына чыкты. Ошондуктан крымдыктар активдүү позициясын билдирүү менен шайлоого катышуулары керек", — деп ырастады Поклонская.
Белгилей кетсек, Россияда Мамлекеттик Думанын VII чакырылышына болгон шайлоо үстүбүздөгү жылдын 18-сентябрында өткөрүлөт. Депутаттар аралаш системанын негизинде шайланышат. Тагыраагы, 225 депутат партиялык тизме менен, дагы 225 депутат бир мандаттык округдан (мажоритардык система) келет.
