БИШКЕК, 26-авг. — Sputnik. Мамлекеттик тарых музейиндеги оңдоо иштери келерки жылы соңуна чыгат. Бул тууралуу Sputniк Кыргызстан агенттигине Архитектура курулуш жана турак жай-коммуналдык чарба агенттигинин алдындагы Турак-жай жарандык курулуш департаментинин адиси Жумабай Мандеев билдирди.
Анын айтымына караганда оңдоп-түзөө иштерин жүргүзүү эки этапка бөлүнгөн.
"Биринчи этапка музейдин алдын, эки капталын жана Манастын эстелиги менен туу турган аянттын тегерек четин оңдоо кирет. Учурда музейдин эшигинин алды толук бүтүп, имараттын сырты жуулду. Алдыңкы бетине болсо айнектер орнотулуп жатат. Мындай иштер сентябрь айында толугу менен бүткөрүлүүсү пландалган", — деп билдирди Мандеев.
Белгилей кетсек, Мамлекеттик тарых музейин реконструкциялоо долбоорун Түркиянын ТИКА уюму каржылап жатат. 25-мартта башталган биринчи этабы музейдин маңдайкы бетин жана "Ала-Тоо" аянтына чейинки аймакты оңдоп-түзөө иштерин камтыган. Музейди реконструкциялоо иштерине 270 миллион сом сарпталары айтылган. Мында имараттын түндүк, батыш жана чыгыш жагы айнектелип, сигнализация, лифт жана эскалатор орнотулмакчы.
