БИШКЕК, 25-авг. — Sputnik. Кыргызстандын милициясы менен Казакстандын полиция кызматкерлери жылкы уурдоого шектелгендерди кармашкандыгы тууралуу Ички иштер министрлигинин маалымат кызматынан кабарлашты.
Ысык-Көл облусунан жоголгон төрт жылкы Алматы облусуна караштуу Райымбек районунун аймагынан табылган. Уурулар арам оюн Ак-Суу, Түп райондору менен Каракол шаарында ишке ашырышкан. Алар жылкыларды чек ара аймактарына жакын жайгашкан аймактарга барып сатып турушкан.
"Ысык-Көл облустук Ички иштер башкармалыгы кылмыштуу топтун мүчөлөрүн аныктады. Кечээ жылкыларды уурдоого шектелип Ак-Суу жана Түп райондорунун эки тургуну кармалды. Аларга карата Кылмыш жаза кодексинин 165-беренеси (мал уурулук) боюнча кылмыш иши козголду. Учурда кылмыш жасоого катыштыгы бар делген топтун башка мүчөлөрү изделип жатат", — деп айтылат маалыматта.
Казакстандан табылган малдын баары ээлерине кайтарылып берилди. Каракол шаарынан июнь айында уурдалган жылкы кымбат баалуу жорго экени белгилүү болгон.
