Кыргызстанда алгачкы ирет байыркы ыкма менен кыргыз жаасы жасалды. Бул тууралуу Sputnik Кыргызстан агенттигине жаачы Самат Сүйөркулов билдирди.
Ал бала кезден бери эле кыялданып келген тилеги орундалганын кошумчалады.
"Бала кезден эле ата-бабаларыбыз колдонгон жаадан аткым келчү. Анан үч жыл мурун баш-отум менен байкыркы жаа жасоого кириштим. Биринчи жаам сынып калып, аны музейге бердим. Экинчи аракетим ийгиликтүү болуп, буюрса даяр болуп калды. Буга эки жыл убактым кетти", — деди Сүйөркулов.
Белгилей кетсек, ал Экинчи дүйнөлүк көчмөндөр оюндарында жаа атуу боюнча Кыргызстандын курамасына кирген.
"Мен Көчмөндөр оюндарына өзүмдүн жаам менен катышам. Бул жааны баарына даңазалоо менен башкаларды да үйрөткүм келет", — деди Сүйөркулов.
Сүйөркулов Көчмөндөр оюндарынан кийин "Салбурун" федерациясынын директору Алмаз Акунов менен биргеликте жаа жасоо боюнча мектеп ачууну пландап жатканын айтты.
Байыркы кыргыз жаасы ылдамдыгы менен тарых беттеринде жазылып калган. Анын жебеси 400-550 метрге чейин учат. Узак аралыкка жаа атуу боюнча тарыхта түрк султаны Селим III жазылган. Ал жебени 889 метрге чейин аткан.
