БИШКЕК, 24-авг. — Sputnik. Дүйнөлүк көчмөндөр оюндарына (ДКО) арналып iPhone 6S үлгүсүндөгү уюлдук аппараттын алтындалган түрү чыкты. Бул тууралуу ДКОнун расмий сайтына жарыяланды.
"Смартфондун уникалдуу дизайны көчмөндөр цивилизациясынын рухун чагылдырып турат", — деп айтылат маалыматта.
Мобилдик аппараттын корпусу алтындан жасалган. Арткы панелинде Көчмөндөр оюндарынын символу жайгашкан. Ааламды чагылдырган тегеректин ортосунда аттын сүрөтү тартылган (көчмөн элинин символу), анын үстүндө күн адамы отурат (башы төрт бөлүккө бөлүнүп, бакубатчылыкты билдирет).
Мындай үлгүдөгү уюлдук аппараттын баасы 266 миң сомду түздү. Жаңы аппаратты индивидуалдык смартфондордун дизайнын жасоо менен алектенген Caviar ательеси жасаган.
Дүйнөлүк көчмөндөр оюндары 3-8-сентябрь аралыгында Ысык-Көлдүн жээгинде өтөт. Ага катышууга 35 мамлекет билдирме жөнөттү.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиа өнөктөшү болуп саналат.
