БИШКЕК, 20-авг. — Sputnik. Жалал-Абад шаарында май куйуучу жайдын тегерегиндеги топуракка батып кеткен кызматкер бутун күйгүзүп алган. Бул тууралуу ӨКМ билдирди.
Маалыматка ылайык, үстүбүздөгү жылдын 2-август күнү Жалал-Абад шаарынын Курманбек көчөсүндөгү "Ауирдин" май куйуучу жайдын кызматкери аталган жайдын күн батыш тарабында башка түстөгү топуракты басып алган.
Бутун күйгүзүп алган киши
© Фото / пресс-служба МЧС КР
Топурак абдан ысык болгондуктан кызматкердин оң буту тизесине чейин, сол буту багалегине чейин күйүп калган.
Жабырлануучу 15-август күнү Жалал-Абад шаардык мериясына арыз менен кайрылган. Эртеси күнү шаардык Жарандык коргонуу комиссиясы аталган жайды текшерүү учурунда узундугу 2 метр, туурасы 1,2 метр болгон, асты бош кызыл түстүү топурактуу жер экенин аныктаган.
Экологиялык техникалык коопсуздук боюнча инспекциясы аталган аймакты королоо боюнча жер ээсине тапшырма берди.
Ал эми Айлана-чөйрөнү коргоо боюнча агенттигинин Жалал-Абад аймагы боюнча башкармалыгынын адистери аталган жердеги топуракты экспертизага жөнөтүштү.
