БИШКЕК, 19-авг. — Sputnik. Кыргызстандын Түркиядагы элчилигинин өкүлү Конья шаарында жергиликтүү жаранды өлтүрдү деген шек менен камакка алынган кыргызстандык кыздын ал-абалы менен таанышты. Бул тууралуу КРдин Тышкы иштер министрлиги билдирди.
Эскерте кетсек, Түркиянын Конья шаарында кыргызстандык 24 жаштагы кыз түрк жараны Муаммер Башак аттуу жаранды өлтүрүүгө шектелип кармалган. Тартип коргоо кызматкерлерине көрсөтмө берип жаткан учурда кыз күнөөсүн жарым-жартылай мойнуна алып, аны жоолугу менен муунткандыгын айтып берген.
Жолугушуу учурунда камактагы кыздан бардык маалыматтар алынып ага кеп-кеңештер берилди.
"Камактагы кыздын мамлекеттик адвокаты менен дагы сүйлөшүүлөр жүргүзүлдү. Ал каралып жаткан иштин процедуралык жактарын айтып берди. Учурда соттук териштирүү иштери жүрүп жатат. Анын жыйынтыгынын негизинде жаза мөөнөтү аныкталат", — деп айтылат маалыматта.
Кыргызстандын элчилиги соттук процесске катышууну көздөп жатат.
