БИШКЕК, 19-авг. — Sputnik. Ош шаарынын Космонавттар паркында адамдарды Сирияда болуп жаткан согушка барып кошулууга үндөгөн 18 жаштагы кыргыз жараны кармалганын шаардык милиция билдирди.
Маалыматка ылайык, аталган жаран оперативдүү кызматкерлердин көзөмөлүндө бир айдан ашык убакытта жүргөн. Бул убакыт ичинде ал атын "Абдуллох" деп өзгөртүп, өзү менен чогуу Сирияга каалоосу менен кете турган адамдарды издеген.
"Иликтөөлөрдүн жыйынтыгында ал Сирияда жүргөн айрым адамдар менен интернет аркылуу байланышып, аларга жакында барарын убада кылганы белгилүү болду. Сириядан террорчулукка үндөп, ага жөнөтүлгөн текст, видеороликтерди жайгаштырып турган", — деп айтылат маалыматта.
"Жеке ноутбугунда Тахир Юлдашевдин, Рашод Камаловдун жана учурда Сирияда жайгашкан "Жоннот ашиклари" тобунун эксремисттик чакырыктары жөнүндө маалыматтар болгон. Андан тышкары ал интернетке Кыргызстанда террорчулук болуусун тиленген көптөгөн материалдарды жүктөгөн", — деп айтылат билдирүүдө.
Тинтүүдөн алынган бардык материалдар атайын экспертизага берилди. Учурда ал баланын байланышы бар чөйрөнү иликтөө иштери жүрүп жатат. Ал сурак учурунда Сирияга жакын арада кетерин, ал жактан ишеними жок адамдарды өлтүрүүгө даяр экенин жашырган эмес.
