БИШКЕК, 17-авг. — Sputnik. Маалымат технологиялары жана байланыш боюнча мамлекеттик комитет жергиликтүү интернет-провайдерлер менен кеңешме өткөрүп, Интернеттин кымбатташына байланышкан абалды талкуулады.
Маалыматка ылайык, талкууга "Кыргызтелеком" ААК, "Sky Mobile" ЖЧК, "Альфа Телеком" ЖАК, "НУР Телеком" ЖЧК, "Акнет" ЖЧК, "Мега Лайн" ЖЧК, "ЭлКат" ЖЧК, "Сайма Телеком" ЖАК жана "IPNet" ЖЧК өкүлдөрү катышты.
"Кеңешмеде Евразиялык экономикалык комиссияга (ЕЭК) казакстандык Интернет берүүчүлөрдүн аракети келишимдеги ченемдерге туура келер-келбестигин аныктоо өтүнүчү менен кайрылуу чечими кабыл алынды", — деп билдиришти Маалымат технологиялары жана байланыш боюнча мамлекеттик комитеттен.
Аталган келишимге ылайык, биримдикке мүчө мамлекеттер электр байланыш тармактарын жана кызматтарды кемсинтүүсүз, бирдей пайдаланууну, байланышты, анын ичинде транзиттик түрүн операторлор ортосундагы макулдашуулардын негизинде жана техникалык мүмкүнчүлүктөрдү эске алуу менен тоскоолдуксуз берүүнү камсыз кылуу үчүн бардык зарыл чараларды (анын ичинде укуктук жана административдик) көрүүгө милдеттүү.
Мурдараак Маалымат технологиялары жана байланыш мамлекеттик комитет менен Монополияга каршы жөндөштүрүү боюнча мамлекеттик агенттигине КРдин Байланыш операторлор ассоциациясы аталган көйгөйдү чечүүдө көмөк көрсөтүү өтүнүчү менен кайрылган эле. Кеп Интернеттин транзити үчүн баанын эки эсе өсүшү жөнүндө болгон. Монополияга каршы ведомствонун директору Болсунбек Казаков казакстандык операторлордун жасаган аракеттери мыйзамдуу экенин карап берүү өтүнүчү менен ЕЭКке расий кайрыдганын Sputnik Кыргызстан агенттигине билдирген болчу.
