БИШКЕК, 14-авг. — Sputnik. Бразилиядагы жайкы Олимпиада оюндарында Кыргызстандын капчыгына медаль алып келет делгендердин бири Арсен Эралиев бүгүн, 14-августта Бишкек убактысы боюнча 19:00дө килемге чыгат.
Арсен 59 килограммдык салмакта күрөштү 1/8 финалга чыгуу үчүн баштайт. Анын алгачкы атаандашы 2015-жылдын дүйнө чемпиону, кубалык Исмаэл Борреро Молина болот.
- 26 жаштагы балбан Талас обулусунун Бакай-Ата районунун Өзгөрүш айылында туулган. Арсен — үйдөгү 5 бир туугандын эң улуусу.
Грек-рим күрөшү боюнча эл аралык спорт чебери. Алгачкы устаты — Кыргызстанга эмгек сиңирген машыктыруучу Камбар Исмаилов. Арсенди эл аралык аренага таанытып, ийгиликтерге жетүүсүнө жол ачып таптаган устаты Кыргызстанга эмгек сиңирген машыктыруучу Мейрамбек Ахметов болуп саналат.
2011-жылы Ташкенттеги Азия чемпионатында бардык атаандаштарын артыкчылык менен жеңип, финалдык беттешүүдө өзбекстандык атаандашын 8:0 эсебинде утуу менен Азия чемпиону болгон.
Эл аралык спорттун чебери Арсен грек-рим күрөшү менен 15 жашынан машыгып келет. Ал Риодогу Олимпиадага аттанган улуттук кураманын капитаны.
Учурдагы машыктыруучусу Пекин Олимпиадасынын күмүш байге ээси, Азиянын эки жолку чемпиону Канатбек Бегалиев айылдаш агасы болот.
