БИШКЕК, 5-авг. — Sputnik. Унаалардын айнегин мыйзамсыз караңгылатуу боюнча жүргүзүлгөн рейд учурунда КСДП фракциясынын депутаты Кожобек Рыспаевдин унаасы токтотулганын Бишкек ШИИБ билдирди.
Терезелерин караңгылаткан Lexus 570 үлгүсүндөгү унаа Ахунбаев жана Чапаев көчөлөрүнүн кесилишинде токтотулган.
"Унааны токтотконубузда Кожобек Рыспаев мыйзамсыз аракеттерин мойнуна алып, тонировканы чечүүгө уруксат берди. Техникалык паспортун сураганыбызда бир топко чейин издеп, таппай койду", — деп айтылат маалыматта.
Мындан сырткары, депутат 2 миң сом айып пул төлөгөн.
Үстүбүздөгү жылдын 18-июлунан баштап унаа айнегин караңгылатууга тыюу салынган. Өкмөттүн токтомунда караңгылатууга жол берилген унаалардын тизмеси да келтирилет. Ага ылайык, президенттин, өкмөт башчынын, спикердин жана Жогорку сот төрагасынын унааларын караңгылатууга уруксат берилет. Мындан сырткары, УКМКнын 9-бөлүмүнүн, "Кыргыз инкассациясы" (акча жана баалуу буюмдарды жеткирүү) ишканасынын жана кылмышкерлерди ташыган унаалардын айнегин караңгылатууга жол берилет.
Караңгылатууга уруксат берген башка документтер жараксыз деп табылат.
