БИШКЕК, 18- июл. — Sputnik. Казак милициясынын маалыматына караганда, бүгүн эртең мененки саат 11лерде куралчандар Алматы шаарындагы Алмалы райондук полициясына кирүүгө аракет кылып, ал жердеги кызматкерди жарадар кылып, автоматын алып качкан. Андан ары жеңил автоунааны тартып алууга аракет кылып, ээсине ок жаңылып, бейкүнөө жаран өлгөн.
Бул кандуу окуядан, 18-июлда кечке маалга көңүл сыздаткан төмөнкү цифраларды атоого болот. Атышуудан полициянын 3 кызматкери курман болуп, бир жай жаран капарсыз турган жеринен ок жеген. Кеминде беш киши ооруканага жаткырылган.
Кол салгандар кимдер?
Алдын ала маалыматтарга ылайык, кармалган 27 жаштагы жаран мурда соттолгон. Ал Кызыл-Ордо облусунда туулган, өткөн жекшембиде бир аялдын канына забын болгон деп шектелип жаткан.
Ички иштер кызматкерлери кылмышкердин жанында жүргөн экинчи кишинин ким экендигин тактады. Ал дагы Алмалыдагы тартип сакчылары турган жайга кирүү аракетинде беркини коштоп жүргөн деп билдирди nur.kz сайты. Анын кылмышка тиешеси бар-жоктугу текшерилип жатат.
Учурда шаарда абал турукташып, тартип коргоо органдары абалга көз салып турушат.
Бийлик эмне деди?
Tengrinews.kz сайтынын маалыматында Алмалы райондук ички иштер бөлүмүнүн имараты курчоого алынып, "Перехват" жана "Буран" деп аталган кармоо операциялары жарыяланган. Алар коопсуздукту камсыз кылуу максатында кеңселерде иштеп жаткандарды көчөгө чыгарган эмес. Террорчулукка каршы операция башталып, террордук кооптуулуктун кызыл деңгээли киргизилген.
"Алматы-1" автобекети курчалып, метродо кооптуулук чаралары күчөтүлгөн. Коргоо министрлиги курал-жарактар сакталып турган кампалар менен жайлар өзгөчө коргоого алынганын айткан. Казакстандын президенти Нурсултан Назарбаев коопсуздук кеңешин жыйынын өткөргөн.
Жымжырт болгон телеканалдын ордун WhatsApp жоктотпой турду
Телеканалдар менен маалыматтык сайттар иштебей туруп калды. Tengrinews.kz сайты бир учурда бул маалыматтык жымжырттыкты профилактикалык иштерден улам деп атап, бирок, бардык каналдар тез арада иштеп баштарын билдиришти. Маалымат агенттиктери эл бул окуялар тууралуу маалыматты окуш үчүн көп киргендиктен, аны көтөрө албай иштен чыгып жатты.
Жалпыга маалымдоо каражаттары эл көрүп, окуп, уга албай калгандыктан WhatsApp каналында маалымдашуу топторун түзүп, кабар алышып жатты.
Кыргызстанда кандай кабыл алышты
Sputnik Кыргызстан агенттигине Алматыдагы окуядан соң кыргыз-казак чек ара көзөмөл өткөрүү жайлары күчөтүлгөн режимде иштеп баштаганын Чек ара кызматынын жетекчиси Абдикарим Алимбаев билдирди. Аталган жайларга кошумча күчтөр тартылган.
Кечке жуук Казакстандын ички иштер министри Калмуханбет Касымовго өкмөт башчысы Карим Масимов Астанадан Алматыга учуп келип, абалды көзөмөлгө алуу боюнча тапшырма берген. Бул туурасында премьер-министр Twitter баракчасына жазган.
Беш киши каза таап, беш киши ооруканада жатат
Кечке жуук террордук кооптуулуктун кызыл деңгээли төмөндөп, сары белгиге алмашты.
"Алматыда террорчулукка каршы операция аяктады. Андыктан, Улуттук коопсуздук комитети кооптуулуктун деңгээлин сарыга түшүрүлдү", — деп билдирди Алматыда террорчулукка каршы борбордон.
Ошентип, бул күнү Казакстандын тарыхында 18-июль полиция кызматкерлери менен бейажал беш жарандын өмүрүн алды. Азырынча, ал кишинин курал көтөрүп, тартип сакчыларынын өмүрүнө эмнеге кол салгандыгы бийлик тарабынан айтыла элек.
