БИШКЕК, 18-июл. — Sputnik. Алматыдагы окуядан соң кыргыз-казак чек ара көзөмөл өткөрүү жайлары күчөтүлгөн режимде иштеп баштады. Бул тууралуу Sputnik Кыргызстан агенттигине Чек ара кызматынын жетекчиси Абдикарим Алимбаев билдирди.
2016-жылдын 18-июлунда түшкө чукул Алматыда террордук кооптуулуктун кызыл деңгээли киргизилди.
Террорчулукка каршы кызмат шаардыктарды тартип коргоо органдарынын айткандарын аткарып, коопсуздук эрежелерин сактоону эскертишти.
Кызыл деңгээл Алмалы Ички иштер бөлүмүнө, Улуттук коопсуздук боюнча Департаментине кол салуудан, кеминде бир полиция кызматкери өлтүрүлгөндөн кийин киргизилген.
Мындай кызыл деңгээл адатта террордук коркунуч жараткан учурда кооптуулукту сактоо иретинде кийин жарыяланат.
