БИШКЕК, 16-июл. — Sputnik. Кыргыз эл баатыры, Кыргыз эл акыны, Улуу Ата Мекендик согуштун ардагери Сүйүнбай Эралиев 95 жашында каза болду. Бул туурасында Sputnik Кыргызстан маалымат агенттигине жакындары билдирди.
Поэзия дүйнөсүнө салмактуу салымын кошкон Эралиев 1921-жылдын 15-октябрында Талас облусунун Үч-Эмчек айлында жарыкка келген.
Президент Алмазбек Атамбаев 2016-жылы Жеңиш майрамынын алдында Эралиевди майрамы менен куттуктап, белек тапшырган.
Сүйүнбай Эралиев чыгармачылыгын Улуу Ата Мекендик согуш жылдарында баштаган. Согушта жарадар болуп, 1944-жылы армиядан кайтып келгенден кийин ал "Сталиндик жеңиш", Талас облустук "Лениндик туу" гезиттеринде иштеп жүрүп, ыр жазуусун улантат да, 1949-жылы "Биринчи жаңырык", 1950-жылы "Тууган жер" аттуу жыйнактарын жарыкка чыгарат. 1944–1951-жылдары Талас облустук "Лениндик туу" гезитинин жооптуу катчысы, "Кыргызстан пионери" гезитинин жооптуу редактору, 1959–1965-жылдары Кыргызстан Жазуучулар союзунун башкармалыгынын катчысы, 1984-жылдан тарта Кыргызстан Жазуучулар союзунун кыргыз акындарынын ассоциациясынын президенти болгон.
Анын "Жылдыздарга саякат", "Атам, жерим жана мен", "Жол", "Космос поэмасы", "Ак жыттар", "Кыргыз жаны", "Кесир инсан" поэмалары өзүнүн көркөмдүк жана жанрдык өзгөчөлүгү менен окурмандардын арзуусуна татыган.
Кыргызстан 15 жыл ичинде Улуу Ата мекендик согуштун канча ардагеринен айрылды?
