БИШКЕК, 21-июн. – Sputnik. Улуу Ата Мекендик согуштун ардагери Мендеш Өмүралиевдин сөөгү Россиядан мекенине кайтарылды. Бул тууралуу Sputnik Кыргызстан агенттигине эл өкүлү Мээрбек Мискенбаевдин жардамчысы Мурат Соорбеков билдирди.
Жоокердин сөөгүн тосуп алуу иш-чарасына ЖКнын депутаттары, Башкы штабдын өкүлдөрү жана Өмүралиевдин туугандары катышты.
Эске сала кетсек, согуш ардагеринин сөөгүн алып келүү демилгесин депутат Мискенбаев көтөргөн.
Ушул жылы Өмүралиевдин сөөгү Россия Федерациясынын борбору Москва шаарына жакын аймактан табылган. Маркумдун сөөгү менен кошо ага таандык документтери да табылган.
Ал Кызыл Армиянын катардагы жоокери эмес, чыныгы баатырларча курман болгонун айткан негиздүү фактылар бар. Ардагер курман болгондо анын эки колунда тең граната болгон. Мындан тышкары, көкүрөк сөөгү минометтун окторунан жабыркаган. Бул нерселер анын чыныгы эл-жери үчүн баатырларча курман болгонун айгинелейт.
