БИШКЕК, 6-июл. — Sputnik. Мамлекеттик каттоо кызматы теракт жасоого шектелген кыргызстандык жарандардын паспортторунун үлгүсүн жиберүү өтүнүчү менен Түркияга расмий билдирме жөнөттү.
Дүйшөмбү күнү Стамбулдагы Ататүрк аэропортунда теракт жасоого шектелген жарандар кармалган. Алар Украинадан учуп келгени белгилүү болгону менен паспорттору Кыргызстандыкы экени тастыкталган. Кармалгандар "Ислам мамлекети" террордук уюмунун мүчөлөрү катары шектелип жатышат.
"Дипломатиялык байланыштар аркылуу Түркияга расмий билдирме жиберилди. Паспорттордун номери бизге белгилүү болсо, маалымат базасы аркылуу текшерип документтин жасалма же аныктыгы тууралуу так айтмакпыз. Мыйзамга ылайык жооп 14 күндүн ичинде келиши керек", — деп Мамкаттоо кызматынын маалымат катчысы Мелис Эржигитов маалымдады.
Ал эми Эрдоган шейшемби күнү Стамбулдагы терактыга кыргызстандык, дагестандык жана тажикстандык жарандардын катыштыгы бар экенин айтып чыкан.
Эске салсак, 28-июнь күнү Ататүрк атындагы аэропорттун эл аралык терминалында үч ирет жардыруу болуп, 44 адам набыт кеткен. Анын 19у чет элдик жаран болгон. Дагы 239 кишинин жарадар болгону маалымдалган.
