БИШКЕК, 6-июл. — Sputnik. Түрк президенти Режеп Тайип Эрдоган Стамбулдун аэропортунда болгон жардырууга кыргызстандыктардын тиешеси бар деп айткандан кийин КРдин Стамбулдагы башкы консулдугу Түркиянын бийлигине бул боюнча атайын сурам жөнөттү. Бул туурасында Тышкы иштер министрлигинин маалымат кызматы Sputnik Кыргызстан агенттигине билдирди.
Түрк президенти буга чейинки билдирүүсүндө аэропорттогу терактыга Дагестандын, Кыргызстандын жана Тажикстандын жарандарынын тийиштиги бар экенин айткан болчу. Аба майданындагы жардырууну жасагандыгын "Ислам мамлекети" террордук тобу моюнуна алган.
"Билдирүү болгондон кийин биз КРдин Стамбулдагы башкы консулдугуна тапшырма берип, терактыны уюштурууга КР жарандарынын тийиштиги бар делген маалыматты тактоо үчүн расмий сурам жөнөтүүнү милдеттендирдик. Азыр жоопту күтүп жатабыз", — деп айтылат маалыматта.
ТИМ өкүлүнүн айтымында түрк тарап аталган маселе боюнча азырынча Кыргызстанга эч кандай сурам менен кайрыла элек.
Белгилей кетсек, Стамбулдун "Ататүрк" аэропортунда үч жардыруу болуп, анын кесепетинен 44 киши каза таап, 239 киши түрдүү жаракаттарды алышкан.
КР жарандары террорист деп аталган беш учурду Sputnik Кыргызстандын төмөнкү топтомунан окуңуз>>
