БИШКЕК, 30-июн. — Sputnik. Жусуп Баласагын атындагы Кыргыз улуттук университетинин имаратынын алдына чогулган мугалимдер ректораттын, андан тышкары Физиканы окутуу технологиясы кафедрасынын жетекчиси Эсенбек Мамбетакуновдун отставкасын талап кылышты.
Акцияга катышкандардын бири, аталган кафедранын улук окутуучусу Гүлмира Төлбаева "адилетсиз кадрдык саясатка" нааразы болуп жаткандыктарын билдирди. Ал ЖОЖдун бөлүмдөрүнүн жетекчилерин шайлоого катыштырбоо үчүн "керексиздерди тазалоо" жүрүп жатат деген пикирин айтты.
"Кафедра жетекчиси Эсенбек Мамбетакунов штаттык жүгүртмөгө төрт улук окутуучуну киргизген жок. Эмне үчүн деген суроого ал штаттык жүгүртмөнү ректорат түзгөндүгүн айткан. Негизи бул ишти кафедра жетекчиси декан менен бирдикте жасашы керек эле. Ал мүмкүнчүлүккө жараша окутуу сааттарын берүүнү убада кылып, алдамчылык жол менен бизди конкурска катыштырбай койду", — деди Төлбаева.
Аталган университеттин коомчулук менен байланыш боюнча координатору Жолдошбек Бузурманкулов Sputnik Кыргызстан агенттигине митингге чыккандар иште калуу жана шайлоо комиссиясынын ишин жокко чыгарууга ниет кылып жаткандыгын айтып берди.
"Сырттан окуу бөлүмүнүн жабылгандыгына байланыштуу учурда окутуучулук курамды жакшыртуу жүрүп жатат", — деди Бузурманкулов.
Анын айтымында, учурда окутуучулардын ишке татыктуу экендигин текшерген тандоо комиссиясынан өтүп, кафедра жетекчилери менен комиссия тарабынан талапка жооп берген педагогдор калтырылды.
