БИШКЕК, 20-июн. — Sputnik. Ош облусунда өтө турган жети күндүк "Манас айтуу" иш-чарасы күз айларына жылды. Бул тууралуу "Саякбай манасчы" коомдук фондусунун мүчөсү, манасчы Улан Исмаилов билдирди.
Эскерте кетсек, жыл сайын өтүп келген Манас айтуу былтыр ноябрь айында Бишкектеги этнокомплекстердин биринде өтүп, соңку күнү иш-чараны өткөрүү кезеги Ош облусуна расмий тапшырылган.
Исмаиловдун айтымында, Ош облустук администрациядан фондунун атына кат жолдонуп, аталган иш-чараны күз мезгилине жылдыруу өтүнүчү айтылган.
Уюштуруучулар бул жылы атайын программа түзүп, катыша турган манасчылардын санына жараша үчилтиктин окуяларын бөлүүнү чечишкен. Адаттагыдай эле мында манасчыларга убакыт боюнча чек коюлбайт.
